ಕುರಿ ಶೆಡ್ ಬಿಲ್ ಮಾಡೋಕೆ ಪಿಡಿಒ ಲಂಚ ಪಡೆದ ಆರೋಪ – ಪಿಡಿಒ ಅಮಾನತಿಗೆ ಸ್ಥಳೀಯರ ಆಗ್ರಹ

ಚಿತ್ರದುರ್ಗ: ಚಿತ್ರದುರ್ಗ ಜಿಲ್ಲೆ ಚಳ್ಳಕೆರೆ ತಾಲೂಕಿನ ದೇವರಮರಿಕುಂಟೆ ಗ್ರಾಮ ಪಂಚಾಯಿತಿಯಲ್ಲಿ ಕುರಿ ಶೆಡ್ ಹಾಗೂ ಇ ಸ್ವತ್ತು ಮಾಡಿಕೊಡಲು ಪಿಡಿಒ ಶಶಿಕಲಾ ಲಂಚ ಪಡೆದಿದ್ದಾರೆ ಎಂದು ಸ್ಥಳೀಯರು ಗಂಭೀರ ಆರೋಪ ಮಾಡಿದ್ದಾರೆ. ಸರ್ಕಾರ ರೈತರಿಗೆ ಸಹಾಯ ಆಗಲಿ ಎಂಬ ಉದ್ದೇಶದಿಂದ ನರೇಗಾ ಯೋಜನೆಯಡಿ ಕುರಿ, ದನ, ಮೇಕೆ ಶೆಡ್ ಗಳ ನಿರ್ಮಾಣಕ್ಕೆ ಎಂದು ಸುಮಾರು 68 ಸಾವಿರ ರೂಪಾಯಿ ಪ್ರೋತ್ಸಾಹ ಧನವನ್ನು ನೀಡುತ್ತಿದೆ. ಇದನ್ನು ಉಚಿತವಾಗಿ ರೈತರಿಗೆ ನೀಡಬೇಕಿದ್ದ ಪಿಡಿಒ ಶಶಿಕಲಾ ಒಂದೊಂದು ಶೆಡ್ ಗಳಿಗೆ 3000 ರೂಪಾಯಿ ಹಣ ಪಡೆದು, ಕೆಲಸ ಮಾಡಿಕೊಟ್ಟಿಲ್ಲ. ಕೇಳಿದ್ರೆ ಯಾರಿಗೆ ಹೇಳ್ತೀರಾ ಹೇಳಿ ಎಂಬ ಉಡಾಫೆ ಉತ್ತರ ಕೊಡ್ತಾರೆ ಮೇಲಧಿಕಾರಿಗಳ ಗಮನಕ್ಕೆ ತರುವುದಕ್ಕೂ ಮೇಡಂ ಬಿಡುವುದಿಲ್ಲ ಎಂದು ಸ್ಥಳೀಯರು ಆರೋಪಿಸಿದ್ದಾರೆ. ಇನ್ನು ಪಂಚಾಯಿತಿಯಲ್ಲಿ ಕಂಪ್ಯೂಟರ್ ಆಪರೇಟರ್ ಸೇರಿದಂತೆ ಎಲ್ಲ ಸಿಬ್ಬಂದಿಗೂ ಏನೇ ಕೆಲಸ ಮಾಡಿಕೊಡಬೇಕು ಅಂದ್ರು ಇಲ್ಲಿ ಹಣ ಕೊಡುವ ಅನಿವಾರ್ಯತೆ ಸೃಷ್ಟಿ ಮಾಡಿದ್ದಾರೆ. ಲಂಚ ಕೊಡಲಿಲ್ಲ ಅಂದ್ರೆ ಕೆಲಸ ಆಗಲ್ಲ…ಇಲ್ಲ ವಿಳಂಬ ಮಾಡ್ತಾರೆ. ಇಂತಹ ಭ್ರಷ್ಟ ಪಿಡಿಒ ನಮ್ಮ ಪಂಚಾಯಿತಿಗೆ ಬೇಡ, ಕೂಡಲೇ ವರ್ಗಾವಣೆ ಮಾಡಿ, ಇಲ್ಲ ಅಮಾನತು ಮಾಡಿ ದೇವರ ಮರಿಕುಂಟೆ ಪಂಚಾಯಿತಿಯ ಸ್ಥಳೀಯರು ಹಾಗೂ ಪಂಚಾಯಿತಿ ಸದಸ್ಯರು ಒತ್ತಾಯಿಸಿದ್ದಾರೆ.

ಪಿಡಿಒ ಲಂಚಾವತಾರ ಹಿಂದೆ ಇದ್ಯ ಮೇಲಾಧಿಕಾರಿಗಳ ಹಸ್ತ..!?

ಇನ್ನು ಪಿಡಿಒ ಶಶಿಕಲಾ ವಿರುದ್ಧ ಕೇಳಿ ಬಂದಿರುವ ಗಂಭೀರ ಆರೋಪದ ಹಿಂದೆ ಮೇಲಾಧಿಕಾರಿಗಳ ಹಸ್ತ ಇದ್ಯ ಎಂಬ ಅನುಮಾನ ವ್ಯಕ್ತವಾಗಿದೆ. ಪಿಡಿಒ ಶಶಿಕಲಾ ವಿರುದ್ಧ ಆರೋಪ ಕೇಳಿ ಬಂದರು ಯಾವುದೇ ರೀತಿಯ ಕ್ರಮಕ್ಕೆ ಮೇಲಧಿಕಾರಿಗಳು ಮುಂದಾಗಿಲ್ಲ. ಹಾಗಾದರೆ ಪಿಡಿಒ ಶಶಿಕಲಾ ಪಡೆದ ಲಂಚದಲ್ಲಿ ಇನ್ನೆಷ್ಟು ಅಧಿಕಾರಿಗಳ ಪಾಲು ಇದೆ ಅನ್ನೋದು ಬಟಾಬಯಲಾಗಬೇಕು ಅನ್ನೋದು ಸ್ಥಳೀಯರು ಆಗ್ರಹಿಸಿದ್ದಾರೆ.